今個星期英國國內嘅政治焦點，除咗落喺首相約翰遜會唔會再次宣佈全國封城（which is應係星期一會成事）之外，就必定要數工黨內鬥呢一單隨時影響英國政治平衡嘅事。因為涉嫌包括黨內歧視猶太人勢力嘅工黨前黨魁郝爾彬（Jeremy Bernard Corbyn），被現任黨魁施紀賢爵士（Sir Keir Rodney Starmer）暫停黨籍[1]，繼而引發黨內唔同勢力之間嘅爭識，甚至差啲引致大規模嘅退黨潮。外界認為作為中間偏左勢力代表嘅施紀賢，係借黨內反猶勢力問題，向重掌工黨影響力多年嘅極左翼勢力開戰，尤如90年代貝理雅修改黨憲第四款推動工黨改革。
向郝爾彬開刀，並非施紀賢嘅第一步。早喺今年6月佢亦同樣以分享涉嫌歧視猶太人嘅Twitter文章為由，開除佢委任嘅工黨影子教育大臣呂碧嘉（Rebecca Long-Bailey）。呂碧嘉除咗係係施紀賢黨魁選舉時嘅勁敵，更加係選時被視為郝爾彬嘅接班人，獲得大量黨內左翼勢力嘅支持。
即使施紀賢俾出「我所帶領嘅工黨唔會容忍反猶太人行為」（the Labour Party I lead will not tolerate antisemitism）[2] 嘅理由去強化暫停郝爾彬黨籍嘅理據，但係工黨內各個極左翼勢力代表明顯不樂於見到左翼勢力被中間勢力一步步蠶蝕，紛紛出聲反對。喺施紀賢公佈暫停郝爾彬嘅黨籍後只係幾個鐘，英國最大工會（同時亦係工黨最大金主）「英國聯合工會」（Unite the Union）嘅秘書長麥克拉斯（Len McCluskey）已經發言，直指施紀賢係意圖冤屈郝爾彬（an act of grave injustice）[3]，而咁樣做將會為工黨內部帶嚟混亂，以至影響將來大選中工黨嘅勝算。
經此一役，施紀賢可能建立到一個果斷同勇敢嘅改革派強人領袖形象，從而改變工黨對外嘅形象同民意支持，但同時亦都可能點燃咗工黨內部派系鬥爭嘅火頭，將黨內矛盾兩極化，隨時動搖施紀賢對黨內嘅控制力，甚至能否繼續維持佢嘅權力。特別而家正處於工黨全國執行委員會（National Executive Committee）改選嘅時間，黨內各派勢力勢必虎視眈眈，掌控全國執行委員會不單根本地決定郝爾彬黨籍最終嘅存留問題，更加會影響施紀賢能否成為成功嘅改革派領袖，抑或變成受制爪嘅紙老虎。不過即使施紀賢過到呢一關，如果唔重新檢視同平衡黨內各派系嘅關係，亦只會代表施紀賢將來係推動改革上，就只能更加依賴黨內以及關聯工會中，中間以及少數右派嘅支持。
係可見嘅將來，施紀賢改革工黨嘅路，可能會好長，但對佢呢講，漫漫長路應該點都好過禁止通行。
[1] https://gaus.ee/2020/10/corbyn-pas-labour/
[2] https://labourlist.org/2020/10/i-dont-want-a-civil-war-starmer-says-in-wake-of-corbyn-suspension/
[3] https://www.bbc.com/news/uk-politics-54742096
