11月嘅香港，武漢肺炎只有零星個案，不過學界卻出現大規模上呼吸道感染，爆發之急，由開始至今（2020年11月19日為止）不足三個禮拜，就已經有超過400間中、小學同幼稚園，單計今個星期已經有150間小學中招，合計接近四千名受感染學童同教職員。因應爆發，幼稚園上星期六開始已經停課，但係未能阻止感染狀況蔓延去中、小學，更加係近年學界爆發上呼吸道感染最嚴重嘅一次。
明明而家仍然處於應付武漢肺炎嘅防疫時期，戴口罩、用酒精搓手、課室消毒等等，係而家校園內嘅常態，點解仲可以爆發得咁嚴重？結果，入咗行教學嘅同學，點醒咗我呢一個無入行嘅人嘅「想當然」諗法。
戴咗口罩，唔代表戴得好、戴得有用
最初頭我好直覺地判斷咗，既然學生、教職員戴咗口罩，應該從根本上減低咗病毒經空氣或者接觸而傳播嘅情況。
但係事實上，我忘記咗一個重點：口罩要發揮功用，需要戴得好先得。
回想翻當年SARS爆發時期，仲係小學生嘅我同樣唔識戴好口罩，無按鼻樑鐵線，甚至突出個鼻都時有發生。觀乎爆發至今，重災區集中於小學同埋幼稚園，實應理解到重災區內嘅學生，比到盡都只係十歲有餘嘅細路，佢哋當中有幾多人真係能夠靠自己戴得好口罩，而且忍受到戴口罩嘅侷促同不便，時刻自我檢查，自我約束？
當連成年人都成日因為「戴口罩唔舒服」而唔戴/戴唔好口罩果時，細路嘅情況只會更差。
部分教小學嘅朋友甚至講到，學生不時都會係除低口罩果時跌咗、執翻再戴上；掂過口罩之後掂自己嘅眼口鼻，更加試過有學生調轉口罩正反面去戴，甚至聽聞有學生會交換戴緊嘅口罩（What the…）。睇嚟，對學生嚟講，口罩真係一個雙面刃。
共用設備有做消毒，唔代表萬能
自從9月學校復課以來，大部分學校都照足指引，每日定時消毒校內嘅共用設備，例如枱枱櫈櫈電腦鍵盤等。不過呢點係唔少教書嘅朋友眼中，真係唔算足夠。唔少學校都有「浮動班」嘅安排，部分班別喺一日嘅課節當中，或者會輪流用到數間課室，轉堂時間極短嘅情況下，能否係兩班學生交接之間徹底消毒使用過嘅課室，絕對係一個不可能嘅任務。加上上節講過，學生戴口罩嘅問題，難保會有病毒因為咁樣而殘留係設備上面，成為對下一堂課學生其中一個受感染來源。
除此之外，更加有一點真係無入行教書嘅我先前無考慮過嘅問題：功課上殘留嘅病毒。即使收發功課嘅方式，已經由學生傳遞改為老師逐一收發，但收集後，到改簿、整理、派發前嘅時間，所有簿冊都一疊壘放置同處理，殘留係簿冊上嘅病毒或者會因此而傳到其他簿冊上。當學生收回簿冊，接觸過後如果無消毒雙手就接觸眼口鼻，這又可能成為病毒傳播嘅路徑。
不過以上都係朋友講完，我能夠明白嘅點。跟住落嚟先係我最難理解嘅一點。
細路有病，家長唔係咁諗；防疫措施，家長唔一定同意
疫情爆發後至今，我一直都認為家長會非常緊張自己子女嘅健康狀況，當子女有咳、發燒，就會帶佢哋睇醫生同驗病毒。但係教書嘅朋友所講嘅，竟然剛剛相反。就佢哋嘅經驗，就有唔少學生明明已經出現上呼吸道感染病徵，但係家長就自己無視，繼續要子女返學，甚至子女已經不斷咳，但照樣在假期帶子女出街周圍玩。而網上亦都有人指出，對於為防疫而做嘅措施，家長唔係關心措施嘅成效，而係投訴損失嘅嘢 [1]。
聽到嚟到，我其實已經啞口無言。
寫到呢度，就連我自己都難以相信，如此漏洞百出嘅情況，香港嘅學校竟然能夠避免武漢肺炎喺校園內大規模爆發。不過劫呢一回事，避得一時避唔到一世，或者對學校、對家長、對政府嚟講都係一個警告：喺大家開始出現「抗疫疲勞」嘅時候，疫情危險離你只係一步之隔。
[1] https://www.baby-kingdom.com/forum.php?mod=viewthread&tid=23394128
