11月3日，就係美國大選日，不論你而家是否身處美國，都好大機會關心緊最終邊一個會成為白宮未來四年嘅主人。拜登？定係侵？如果我哋睇美國各大傳媒集團同受委托研究機構嘅傳統民意調查，都好一致咁答你 —— 拜登支持度好高，仲領先侵接近甚至超過十個百分點。
但係經歷過上一屆大選（2016年大選）嘅人都會印象深刻，侵點樣「耻笑」一眾睇低佢嘅民調報告，從而登上總統寶座。而當年成功推測到侵當選，根據社交網站同搜尋引擎數據去做預測嘅新興「大數據」（Big Data）報告，亦喺今屆大選結果推測中，成為喺一眾睇低侵嘅民調中嘅小眾異數。Expert.ai 判斷拜登只係領先侵三個百分點 [1] ，另外兩組研究團隊甚至推論侵實際上得到較多選民嘅支持 [2] 。到底點解兩種方法得出嘅結論咁唔同？我哋又應唔該信傳統民調？
先劇透我自己嘅取態：
我個人較為相信大數據報告嘅推論，亦傾向相信侵能夠連任嘅。
傳統民調嘅做法，不外乎透過電話、問卷等方式，被訪者跟隨一系列預設嘅問題，就自己嘅取向而作答。根據呢一種做法，如果要降低調查結果嘅誤差，就必然要從取樣數量、取樣目樣、取樣方式三方面落手。一份理想嘅民調，係應該要被公平採集，有足夠採樣數量、包含所有光譜嘅被訪者，訪問問題公正又具意義、用詞客觀，被訪者真實作答，調查過程同統計分析都要足夠嚴謹。
理想很美好，現實上美國大選當中嘅傳統民調，實在難以符合以上所講嘅條件。由擁有政治取態同立場嘅傳統機構所做嘅民調，好有可能由一開始就已經無辦法公平地搵到來自所有光譜嘅被訪者，或者已經嘗試過，但係被邀者因為傳媒同研究機構嘅立場，甚至單純唔想俾人知自己嘅政治立場而拒絕。
而呢一班「拒絕透露投票取態」嘅選民，點樣可以得知（或者最少推測）佢哋嘅投票取態？呢個就係大數據喺民調嘅作用。就以上面提過嘅大數據機構去講，佢哋分析唔同時期喺社交網站上面嘅討論話題、留言當中所表達嘅情緒同立場，以及搜尋引擎當中，針對選戰相關嘅唔同議題（疫情、經濟、BLM 運動、槍械管制等等），綜合分析各個候選人喺選民眼中嘅形象，同埋唔同陣營嘅「文宣」能否打得入選民嘅腦海，從而推測候選人嘅支持度。呢一招，基本上就包含曬所有立場嘅選民（只要佢有社交媒體帳戶發表政見、或者有用搜尋引擎搵選戰相關嘅資訊）。喺超過七成選民有用社交媒體嘅美國 [3] ，呢支「新力軍」對於發掘收收埋埋自己立場嘅嘅選民非常有用，亦對今屆選戰至關重要。
一般認為共和黨人傾向較高比率會「拒絕透露投票取態」，特別由上一屆大選，侵受到大量批評時開始加劇。嚟到今屆選舉，正值因疫情、種族、經濟等問題而惡化嘅二元政治意識對立，侵嘅支持者自然較上屆更想保留自己嘅政治取態。甚至被研究員喻為「會對自己嘅醫生、會計師、牧師講大話嘅美國人，有咩可能對住三唔識七嘅民調調查員講真話？」[4] 。唔少分析認為正正係民調調查所缺失嘅呢 17%「沉默的共和黨人」[5] [6] 將會好似上屆大選咁，成功將侵保於白宮之內。
仲有不足一日，大家就會見證到，到底今屆大選，會係傳統民調嘅大勝，抑或大數據報告嘅再一次逆襲。
[1] https://fortune.com/2020/10/14/polls-trump-biden-presidential-race-artificial-intelligence/
[2] https://www.swissinfo.ch/eng/politics/why-two-swiss-led-data-models-predict-a-trump-win/46131826
[3] https://www.socialbakers.com/blog/us-election-report
[6] https://thehill.com/opinion/campaign/522957-dont-believe-the-polls-trump-is-winning-bigly
